荷李活巨星佐治古尼（George Clooney）噚日出席其執導嘅大作《堅離地死人劫案》（Suburbicon）威尼斯影展紅地氈，仲帶埋生完孖胎3個月嘅老婆Amal出席，今次係二人於生BB後首度一齊亮相，成為全場焦點。

3個月前Amal先生完孖胎，但噚日已經fit爆現身，佢着住淺紫色嘅Atelier Versace貼身長裙，身材仲fit過之前，連同着住Giorgio Armani西裝嘅佐治古尼，二人非常搶鏡。兩夫妻於紅地氈有講有笑，又狀甚親密晒恩愛。佐治古尼仲走向苦候多時嘅粉絲度簽名同合照，一眾粉絲勁激動。

此外，同部戲中嘅男主角麥迪文（Matt Damon）照舊攜妻到場，不過今日老婆就收起「湯碗胸」。女主角茱莉安摩亞（Julianne Moore）雖然年屆56歲依然搶鏡，更中門大開同老公Bart Freundlich到場，為威尼斯影展開幕以來最星光熠熠場面。