先來陳勤記的滷水鵝,嘩,肉質之柔軟入味可以用震撼嚟形容,最怕食到啲練過「橫練鐵布衫」嘅滷水鵝,鵝肉堅如鐵甲,嚼之全口是渣,有如𡁻木頭一樣。陳勤記的滷水鵝肥瘦適中,毋須增磅亦毋須纖體,一家人風快幹掉大大隻一隻鵝,唔係話嚇你,陳勤記下午時分便賣晒貨,夜晚想食都冇得食。
亭記小廚的馳名沙爹牛肉炒河,沙爹醬濃郁惹味,食到一粒粒的碎花生,河粉索盡精華,食過唔想再食其他地方嘅沙爹牛河。
陳春記的豬雜湯享負盛名,豬雜內容豐富,尤其是豬肺、豬腸、豬紅,又軟又滑,最便宜的材料弄出龍肉的味道。一啖湯入口,肉香滿溢,不止開胃,直情開心。
皇后街的熟食中心尚有好幾檔食肆,出品同樣精采,真箇是卧虎藏龍,媲美光明頂或惡人谷,如要每檔每樣試清楚,真係要分幾次慢慢食。