韓國天團BIGBANG成員太陽日前襲港，噚晚喺亞博館舉行《TAEYANG 2017 WORLD TOUR [WHITE NIGHT]》演唱會，太陽為港迷獻唱《Only Look At Me》、《1AM》、《Darling》等逾20首歌曲，當中更自彈自唱《Last Dance》，令粉絲相當驚喜。

太陽噚晚落力演出，不時瞓身、跪地，又身穿透視上衣示人，隱約晒肌，而下身搭夾嘅白色褲似乎開窿太大，導致佢露出打底嘅黑色boxer，不過太陽就冇理會投入表演。太陽又以英文同粉絲溝通，表示好掛住港迷，又指：「我記得上次來港開騷係BIGBANG嘅演唱會，當時大家都好熱情。」

當太陽唱到《I Need A Girl》時，粉絲更一齊大合唱，之後又自彈自唱組合BIGBANG嘅歌曲《Last Dance》，太陽表示：「唱BIGBANG嘅歌就令我諗起我啲成員，好掛住佢哋。我人生中最開心嘅事就係遇上成員組成BIGBANG，亦多得大家嘅支持，令我哋度過咗10年，我永遠唔會忘記今日。」並以廣東話「多謝晒，我愛你」感謝粉絲10年來嘅愛護。唱出最後一首歌《Darling》前，太陽問粉絲幾點，粉絲似乎唔想演唱會咁快完結，搞鬼表示只係7點，立即畀太陽話「講大話」，場面搞笑。

安哥時，換上黑色背心、戴上黑帽嘅太陽一連勁歌熱舞《Break Down》、《Good Boy》、《Stay With Me》三首歌曲，太陽更將毛巾及帽拋到台下，引起粉絲瘋搶。之後就好似兄弟G-DRAGON(GD)澳門開騷咁扮完場，先90度向粉絲鞠躬致謝，然後想離開行到大螢幕前，大螢幕又唔開門，升降台亦唔降落後台，太陽就再一次安哥，唱出《BANG BANG BANG》及《Fantastic Baby》，現場氣氛高漲，粉絲都相當興奮，最後以人氣曲《EYES,NOSE,LIPS》為演唱會畫上完美句號。