當年今日
關於我們

2線波早飛:卡軍跌watt捧李斯特城 - 華度

蘋果日報 2006/12/22 06:00


季初一度喺英冠聯榜首領先嘅卡廸夫城,近況回落得相當厲害,最近8場聯賽就失咗總共18分,近6場不勝,已經跌到落去第5位;喺佢哋呢段跌勢中,遇到史篤城、高車士打等當頭起球隊,都冇運行。今日卡廸夫城就作客近兩仗連勝,又係有當頭起之勢嘅李斯特城,寧博李斯特城上盤。
修安聯呢支今季英冠聯升班馬,升班後一直表現不濟,似乎實力同其他英冠聯球隊比較,仲有啲距離,暫時就只排喺榜尾位置。今輪秩序雖有主場之利,但迎戰對手係近3場連勝、兼每場都入3球嘅大勇榜首球隊伯明翰;修安聯更加喺周中聯賽盃,作客同英超聯球隊熱刺踢足120分鐘,最後仲要輸埋出局,主力射手伊斯活特最近8場比賽亦只入得1球,成隊波冇態冇士氣,伯明翰「依絲W」。
最近先後因球場積水,以及受到濃霧困擾,令主場對克魯嘅聯賽兩度改期嘅英甲聯球隊燦美爾,今周末仍然喺主場作賽,會唔會再度改期就要問過個天至知,但一班燦美爾球員,希望喺主場聯賽延續4連勝嗰度火,就應該谷到爆!除咗主場聯賽已3連勝,燦美爾最近6場聯賽亦錄得4勝2和,今迎戰對手基寧咸正處不勝低潮期,主W應冇大問題。
文:華度