「無官一身輕」，今個月喺擂台輪空，令自己畀貼士嘅壓力大減；堅持唔推介國際賽，大力提供森林，單W有1.62倍，冒勇者買「主勝」者2.72倍，結果輕鬆勝4:0，希望仲信筆者貼士嘅各方好友，上個禮拜度過愉快嘅周末。
馬會高層曾經笑對我說過：「你哋蘋果推介嘅貼士尤其係波膽會打熱賠率。」我喺度當然唔係要吹噓本報嘅影響力，查實好些波友會習慣跟報紙買波，尤其當你大字標題貼大冷波膽，所指如阿仙奴勝米堡5:1、曼城和熱刺3:3等，由於波膽彩池非大，每人十元八塊，已可能令到這些波膽嘅賠率下調四、五成，變成唔抵買。

次等賽事不乏寶藏

同樣情況到了每個周末，英超4強嘅主客和賠率絕大機會落飛，就算1.25倍嘅單W，都會打熱至1.18至1.2倍，擁躉們熱情票也。但大家不要看輕這個跌幅，很多股票基金經理，投資一年賣出買入，埋單計都只係希望十零個巴仙的回報率。所以我早說過，英超波買早飛點都着數啲。
由此引申，如果英甲王森林出場當日，係上周六主打的賽事，我個人估計足智彩開出的單W賠率應該跌至1.57倍左右；但大部份波友當然將注碼投放喺英荷法德意５大強隊身上（希望波友條大熱過關飛，唔係衰喺世盃冠軍意大利手上），森林賠率至開賽前無變過，受人忽視嘅賽事，喺我眼中永遠最具吸力。君不見，澳彩𠵱家部份次級賽事嘅擂台躉，都長期唔畀你買亞洲盤，就知道莊家顧忌嘅係乜嘢賽事。
好嘞，唔鍾意賭國際賽，都要循例畀周三嘅貼士；只此一場，荷蘭上周作客僅勝盧森堡一球，今次迎戰白俄，「主勝」1.5倍啱胃口。
文：蘋果波神