【18:50】康樂及文化事務署宣布，黃金泳灘的紅旗已經除下
【18:30】早上有市民在黃金泳灘發現鯊魚屍體，防鯊網承辦商下午派人到場，用聲納、無人機等儀器試圖找出鯊魚，但亦無發現。

-----------------------------
懷疑出現鯊蹤的屯門黃金泳灘，今晨豎立通告指仍然封閉，至傍晚康文署才宣佈紅旗除下，其間市民到泳灘暢泳或曬太陽的意欲不減。《蘋果》今晨到黃金泳灘，發現有數十人在泳灘岸上，當中不乏一家大小，亦有約10人仍然落水，並游到防鯊網外圍。落水的泳客大多表示不怕鯊蹤，有泳客甚至表示「成隻手咁長嘅大魚成日都見到，唔驚！」

雖然今晨泳灘封閉，亦掛起紅旗及廣播，但仍有救生員當值，見到有泳客落水，救生員亦揮手示意着泳客上水。高小姐帶着年幼兒子在岸上玩沙，「冇擔心鯊魚，我哋唔落水，鯊魚唔會上岸嘛，我覺得依家疫情少咗，先帶佢（兒子）出嚟，我哋喺9點非繁忙時間自己揸車嚟，唔會咁危險，一陣就返屋企。」

落水的周先生被救生員勸上岸，「冇強制唔畀落水，我都唔會游出去，曬一曬太陽，浸一浸水，唔會游出去，有鯊魚就梗係唔會落水啦。」

官先生亦有落水暢泳，他每天都來黃金泳灘，他說昨日救生員在更亭看見一條大魚「好似隻手咁長，就叫人上水，又派啲船出去睇，我諗住今日冇事，點知今日都冇開返（泳灘），我哋游慣水，啲魚咁大條成日都見到，唔驚，係灣裏面啲烏頭魚都成呎幾長，佢哋喺遊艇會嗰邊產卵，好多人喺度釣烏頭，烏頭就游咗過嚟，大烏頭浮喺水面，救生員見到好緊張就叫人上水，佢哋都係睇到一次啫。」他說救生員有勸喻泳客上水，「我覺得呢度暫時都安全，好多人攞望遠鏡嚟睇（鯊魚）都睇唔到！」

康文署傍晚表示，防鯊網維修承辦商已完成檢查該泳灘的防鯊網，確定防鯊網範圍內沒大魚蹤影，防鯊網亦運作正常。署方呼籲泳客在救生員當值期間和於防鯊網內泳區暢泳，以策安全；又指該署會繼續提高警覺，加強泳區範圍內的巡邏工作。

昨早9時半，救生員在泳灘中央位置更台當值期間，發現離岸一至兩米水位及膝位置發現一條大魚，當時大魚未有露出背鰭，但尾鰭圓扁及修長，恐防是鯊魚或其他有攻擊性大魚，立刻通知康文署，並掛起紅旗及廣播，通知在場泳客懷疑發現鯊魚，呼籲泳客盡快上水或登上浮台暫避。

-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新
-----------------------------
你敢爆，我敢獎！ 立即WhatsApp《蘋果》24小時爆相爆片熱線 或致電：63836568