上海市長韓正率領代表團嚟香港，又同董班子簽署所謂滬港更緊密經貿合作嘅「框架協議」。喺呢個框架之下，上海佬要求學習香港嘅機場港口管理。韓正話裏有骨咁講，上海係一個年青人，香港就係壯年人，年青人應該多多向壯年人學習。
上海佬焗阿董簽嘅，係香港嘅老襯契。香港𠵱家成日講，自己有乜有物「優勢」，大陸係追唔到，要善用優勢，嚟落實「一國兩制」。乜嘢叫做優勢？就係人哋冇嘅嘢，自己有；人哋唔識嘅嘢，你識。你將自己嘅特長，教埋畀人，等人哋學埋，咁又有乜「優勢」可言？
香港二十年來，俾大陸追上，就係因為香港人當初戇居居。毫無保留，乜都教晒大陸，唔識自己留番一手。雖然，有好多嘢，就算你教佢，佢一世都學唔識，例如議會民主、人權、自由；但係炒金炒股、市場經濟、集資融資，你教識佢，佢就一定飛起你，跟住重睇你唔起，叫你做港燦㖭。
美國同歐洲，同中國做生意，就好小心，只會賣啲貨畀佢，講到「技術轉讓」，一定步步設防，甚至視同商業機密。俾你學咗一套精髓，你以後重會幫襯我？

不愧係政治盲毛
阿董呢條超級大懵公，本來做生意出身，呢啲咁嘅常識，再蠢都冇理由唔知。香港重剩番幾多獨有嘅「優勢」？阿董六年敗家，都已經敗得七七八八，機場港口管理知識，係英國佬留低，阿董攞埋去同上海佬「分享」，第日啲航空港運，港口貨櫃，重使乜用香港做「中介港」？到時中國重需要香港咩嘢？可口可樂公司，若果一早將條汽水秘方公開，今日又點會全球獨市，重賺緊大錢？

阿董始終都係一個外來嘅上海佬，唔係香港本地人，佢對上海嘅感情，多過香港好多。呢一樣，大隻江揀佢，總算冇揀錯。韓正走落嚟，略施小計，阿董就懵吓懵吓出賣香港利益，協助上海喺同香港嘅競爭之中取勝，呢種所為，美其名為「合作」，其實係無間道至真。
今年一月，沙士喺廣東開始流行，廣東省衞生廳，早已有一份關於沙士嘅報告，到咗三月，香港嘅衞生署官員向廣東衞生廳攞，廣東省就托手踭。嗰陣時，唔聽見廣東話要「更緊密防疫合作」？唔聽見有乜「預防沙士共同框架」？廣東佬有冇阿董咁天真？冇。因為講到利益，乜都係假。
就算將香港嘅機場港口經驗教晒上海，阿董都應該問准吓廣東省肯唔肯。珠三角同長三角競爭緊，廣州深圳各地一樣有機場同港口。你阿董向上海大開中門，即是累埋廣東。咁樣自把自為，唔怪得廣東省啲官員咁憎阿董。
阿董不愧係政治盲毛，香港俾佢敗多四年，當得嘅當，賣得嘅賣，送得嘅又笑騎騎猛咁送，重有剩？就算教嘢，都要上海佬交番啲出嚟讓吓步，例如，叫上海市長開放上海市民無限落嚟買樓，灌番啲水落嚟，咁都好過冇。阿董個人生得蠢，全世界都知，不過今次真係蠢到連韓正都掩住半邊嘴笑。


傳真︰2623-9278
電郵︰[email protected]