王宗堯、莊端兒、蔡國威、李綺雯噚晚喺九展出席電影《水行俠》嘅首映，雖然噚晚天氣有啲凍，不過莊端兒一於懶理，着住deep v連身裙出席，果然係抵冷貪瀟湘！

王宗堯話同蕭定一嘅合約已經完咗，不過佢話：「其實我哋完咗約一段時間，不過公司都會幫我接job，大家依然keep住合作關係，睇吓有乜嘢幫到，等佢冇咁忙同煩先再傾工作嘅事。」

佢仲話：「我都知HMV嘅營運係困難，o依家做生意都好慘，普遍好少人會買碟，香港嘅經濟市道都唔係好，好多舖頭都執。」有冇影響工作量？佢話：「有啲工作o依家都傾緊，我都想揀啲自己想做嘅嘢，我唔係好心急去搵經理人幫手，反正仲有舊公司幫手，公司o依家進入艱難時期，唔想喺呢個時候跳船，我哋香港嘅藝人係唔會咁冇義氣！」

精選娛聞，喺晒《娛果》
http://fb.com/appledailyent