後佔領時代到底要搞啲乜,先可以平息後生仔嘅不滿?呢個問題梗係特首梁振英重中之重,唔知梁振英喺今日發表嘅施政報告會有乜針對性措施,但花生友同教育界中人講起年輕人嘅問題,個個都搖頭嘆息,仲話其實老師比起學生可能更加難搞,唔少校長都好頭痕喎!
查實呢,學生有理想之餘帶點反叛,大家都接受係年輕人嘅激情,而佢哋嘅取態,好多時都係受學校影響,所以教師點樣教就好受外界關注。最近政圈咪傳出,建制派想扭轉教育界由民主派嘅教協主導嘅傳統,希望壯大吓左派教育界組織,例如教聯等等,據知都係中央諗法,無非想啲教師「受控」,同前港澳辦副主任陳佐洱話香港教育制度種出「毒豆」喻港青理念一致,其實都係想鬧啲教師之嘛。