今晚黃耀明，何韻詩及電影人舒琪在金鐘現場，上完台佢哋按受傳媒訪昭，問佢哋睇完學聯同政府對話，係咪都有啲失望?何韻詩話:

「我嘅睇法，如果呢一場係辯論比賽呢，學生係贏咗漂亮嘅一仗，因為你見到一眾嘅官員，佢地五個入面得三個去發表說話啦，跟住其實佢哋講嘅嘢一路重覆緊呢兩年嚟大家都知道嘅重點，但係學生方面一路進步中，攞出佢哋嘅魄力，勇氣，理智同理據，各方面都表現出色，我哋唔好執著於呢一刻喺呢個會談入面得到啲咩成果出路，反而應該喺呢班年青人身上，睇到未來嘅希望，唔應該比失望嘅情緒去籠罩住我哋，要向一個長遠方向去諗，為呢年青人感到驕傲。」

明哥就話:「無論呢個對話，係幾咁唔好睇，因為係想搵答案，當然未搵到，我都希望繼續有對話，希望佢哋唔好再耍我哋，因為嗰種遊花園嘅態度係好明顯，佢哋繼續遊，我哋就繼續散步，繼續堅持，政府係不能無視，快啲繼續同同學市民對話，同唔同嘅組織，今日係學聯，仲有其他組織，幾個唔同組織一齊。」

問到演藝界會唔會都同政府對話?明哥話:「我要承認我唔係一個好叻談判桌上傾呢樣嘢嘅人，留比一啲更清晰嘅人，我哋有唔同崗位。」

講到今晚阿詩睇TVB直播，一到同學發言就播廣告，佢話:「我本身睇佢直播都無奈，因為冇得揀，佢好明顯地喺巧妙位，到梁麗幗開始講話，突然去咗一個新聞廣告，唔知係咪咁啱得咁橋啦，但係作為觀眾係幾唔舒服，又要搵第二個方法去收睇，反映到一個嚴重嘅情況，有啲媒體係去自我審查，令到一班師奶睇唔到重要對話，係好荒謬，就算你要去廣告，點解啱啱係呢個位呢?我諗我哋唔會有答案，我好認同明哥嘅說話，每個人都有自己崗位，應該比多啲信心呢班同學，佢哋今日展現咗質素，代表香港人去表達我哋嘅訴求，當我哋喺電視旁邊火起，你見到佢哋依然冷靜克制，係真係香港人未來嘅希望。」

咁問阿詩係咪堅持留守?講到杜汶澤去金鐘叫佢返屋企，阿詩笑言:「佢係咁講啫，大家要用智慧去理解佢嘅說話，我都誠邀佢嚟多幾次，真係冇人知會發生咩事，我哋喺呢度嘅角色係令到同學們有一個支援，我相信好多情緒會出現，好似失望，又可能會有人會挑撥，呢度嘅市民記住，呢20幾日嚟嘅智慧，點去應對，打出呢份理性和平，唔好比人借機去令到混亂發生。」

講到內地封殺名單有佢兩個份，兩個人不期然大笑:「都唔係最近架啦」仲反問係咪update咗?明哥話:「擔心就唔會喺度坐廿幾日。」阿詩話:「要講返我哋嘅訴求，香港被承諾咗咁多年嘅真普選，從來冇內地講嘅咩「顏色革命」，只係想一個承諾嘅真普選，我哋明白作為中國嘅入面係要有一國兩制喺度嘅，係咪真係咁冇空間，我諗唔可以演譯為一個對抗，民主對於所有國家，我自己認為係好事，當所有人都得到保障，都係憑住良心去做我哋做嘅嘢。」

明哥話:「我哋只不過係要真普選嘅空間，但就喺內地嘅封殺嘅傳媒入面聽唔到真嘅說話，扣左革命帽子落嚟，好可悲，睇唔到真實嘅報道，都唔希望內地係一個咁封閉嘅空間。」