由《蘋果動新聞》舉辦，第一屆《最港電影大獎》頒獎典禮已經圓滿結束。

入行16年嘅鄧麗欣，先後拍攝超過40部電影，今年佢終於憑電影《空手道》，喺各大小電影頒獎禮得到好成績，今次喺《最港電影大獎》，成功奪得「最港女演員」大獎！

對於今次得獎，Stephy：「今次真係好開心，暫時嚟講，今次係我第二個演員獎項，其實得到好多人欣賞呢套電影，亦肯定到自己嘅演技，我覺得呢啲幸福嚟得突然，希望keep住有呢個成績！」Stephy話知道今次係觀眾有份投票選出，佢就話：「好多謝大家嘅愛，對我嚟講，每一票都係份愛，好多謝大家鍾意呢套戲同埋我嘅演出！」

事實上Stephy亦都憑《空手道》有份角逐影后，信心方面，佢好坦白話：「之前一直唔敢諗太多，o依家可以開始諗吓，但係對金像獎始係唔敢諗亦唔敢講，有提名已經好開心！」Stephy仲話要特別多謝杜汶澤：「如果冇佢唔會有呢套戲， 我亦唔會有機會拍！」查實Stephy喺電影裡面，有唔少被打嘅場面，佢好搞笑話：「如果俾人打可以攞咁獎，真係好值得！」

Stephy仲有感而發話：「不過有咁多提名同獎，對我嚟講係多咗一份責任，未來揀劇本要慎重啲，但唔係一定要指定拍某一種電影，我好希望可以拍多啲不一樣嘅電影，好多故事題材都可以考慮：」

場地提供：香港東隅

精選娛聞，喺晒《娛果》
http://fb.com/appledailyent