韓國男團JYJ成員朴有天去年6月當兵期間，先後捲入四宗性侵案，事後被判無嫌疑，不過事件就令佢形象跌至谷底，佢退伍後一直未有新工作。

而朴有天同南陽乳業家族外孫女黃荷娜原定今年秋天結婚，不過婚期一改再改，到0依家雖然都未知佢哋係唔係已經結咗婚，但睇黃荷娜嘅Instagram，可見佢同朴有天感情依舊好好，佢近日就上載去咗蘇梅島度假，朴有天仲疑似同行，事關黃荷娜不時上載短片及照片，當中可見有一名男子同行，不過該名男子就唔見樣，最多只見手，照片中仲可見男子手上載上疑似婚戒，令人更加相信與黃荷娜同遊嘅就係朴有天。

而黃荷娜噚日就又更新Ig，並上載短片及照片，當中可見佢大嘆燭光晚餐，又喺現場大擺甫士及跳舞，好鬼風騷。而黃荷娜仲留言疑似向朴有天講冧爆說話，當中佢話：「喺呢個世界上比任何人都慈祥，浪漫嘅一個人，因此我每日都好幸福。」又大讚愛人冇忘記過任何一次嘅紀念日，即使好細微嘅事佢都照顧周到，大讚對方擁有慈祥及美麗嘅心靈，覺得呢個世界上唔會再有呢啲人。

雖然黃荷娜就冇開名講邊個咁鬼sweet，但外界都知佢所講嘅就係朴有天。同時兩人喺今次蘇梅島之遊就好浪漫，由情侶Spa開始到喺海邊燭光晚餐，又獨自準備歌曲，大讚男方好可愛同完美。

另外，朴有天嘅隊友金在中將於下月26號32歲生日，佢為咗同粉絲慶祝生日，將於下月27號舉行迷你演唱會與粉絲慶祝。

更多韓流，喺晒《娛果》
http://fb.com/appledailyent