波友們近排好靜局，叫做有洲際國家盃同U21歐國盃吊吓波癮，如果話你知歐霸盃首圈外圍賽開咗波，有冇興趣睇吓先？聽落好趕客，其實有唔少那些年球星喺過去兩日歐霸外首回合為所屬球隊建功，力爭延續歐洲旅途架！首先講吓當年因為「足金金猴」成名嘅堅尼米拿，呢位37歲老牌射手自2014年重返格拉斯哥流浪，依然係主力射手之一，格流周四上演球隊6年來首場歐洲賽，結果又係靠佢接應克羅地亞中場卡蘭積卡開出罰球建功，為球隊險勝盧森堡球隊尼達干（Progres Niederkorn）1:0，次回合作客有排震。

至於踢過利物浦、車路士同阿仙奴等英超勁旅嘅以色列好波之人班拿約同樣三十有七，但周四為耶路撒冷比達上演逆轉奇迹，完場前2分鐘仲係落後畀匈牙利球隊華沙斯（Vasas Budapest）1:3，但佢喺88分鐘入波，加埋隊友補時連入兩球反勝4:3！而另一阿仙奴名將、36歲嘅艾沙維早一日為俄羅斯球隊卡拉特正選披甲，結果同克羅地亞中場伊利斯域、科特迪瓦前鋒高賀齊齊梅開二度，為球隊主場大勝立陶宛嘅FK阿特拿斯（FK Atlantas Klaipeda）6:0。