成日話：「十八年後又一條好漢」，現年48歲嘅伍詠薇同老公練海棠眨吓眼結咗婚18年，聽日7.1回歸就係佢哋18周年紀念，兩公婆結婚咁多年都咁恩愛，尤其伍姑娘對老公好包容，雖然去年被周刊撞破練海棠背妻車廂密會長髮女，但伍姑娘大方為老公護航，輕鬆拆彈，平息小風波，兩人繼續恩愛。

伍姑娘同老公練海棠聽日有約，所以今晚提早慶祝，佢哋拍拖撐枱食燭光晚餐，伍姑娘仲貼相facebook放閃，佢留言：「Still pre-18th wedding anniversary dinner.Mr.Lin's treat.Thank you for everything.」伍姑娘仲抵死hashtag咗#沒血緣關係有幾多個18年同#野馬miss5，用野馬比喻自己，果然係烈女。相中所見，佢兩個都臉紅紅，high high哋，《蘋果》今晚打畀伍姑娘，佢仲未醉，好清醒咁話：「一陣仲有第二場，去開心。」問到聽日點慶祝，佢話：「今晚提早慶祝，聽日狂瞓。」

伍姑娘喺18年結婚周年紀念日前夕話：「18周年唔感慨，而我冇諗過同一個無血緣關係嘅人可以一齊18周年，即使我爸爸喺我18歲時都離開，有血緣關係嘅爸爸都陪唔到我過，唔好話有冇血緣關係，同到人類過18周年，係要喝采嘅。」

兩公婆喺十點幾左右，喺中環行街，之後見到一間酒吧幾啱心水，就入咗去慶祝，喺入面飲咗一陣，伍姑娘就拉埋個女仔朋友出去門口一張枱談心，有講有笑，之後老公都攞住兩杯酒出嚟一齊傾，三個人玩得好開心，伍姑娘仲送吻，鍚完女性朋友就鍚老公。