南華近期屢爆公關災難，花生指數最高要數七月四號開操嗰陣高調安排曾效力馬德里體育會等球隊嘅西班牙前鋒巴拿里奧跟操。點知本報記者發現巴拿里奧五年前曾涉性虐待妻子、性侵犯四名女子同襲擊鄰居而被捕，仲俾薩拉戈薩解約，即晚搵南華了解情況，會方一粒鐘後就宣佈終止試用，認真兒戲。

即晚棄新援　抽錯東方水

又例如上季南華喺四月鬥東方場聯賽大戰，自己無緣爭冠，但場波勝負決定東方可唔可以提早稱霸港超聯，結果球會就同足主張廣勇拍片放上fb，豪言東方想提早拎冠軍，要先問過佢啲球員。最終東方2:1險勝南華，張廣勇仲要俾網民留言搞好隊波，唔好攞架嚟丟。其實佢哋fb亦經常出事，好似禮拜一東方宣佈新季變動，南華當晚就喺fb回應，指足主張博士深感惋惜，點知換來網民批評南華抽水。
不過公平啲講，國際球星都會犯上公關災難。例如李斯特城前鋒占美華迪上月同球會續約，老婆碧琪就向李城球迷開火，要佢哋為狠批丈夫離隊道歉，結果換來更多李城球迷不滿。