賭王何鴻燊近排真係唔多老利，澳博（880）上市本嚟高高興興，但被細妹十姑娘何婉琪提出司法覆核上訴，搞到押後上市，激到夭心夭肺，就連賭王兩個仔女超瓊同猷龍亦唔生性，冇撐住老竇台戲。
點解咁講？賭王大女超瓊睇住嘅信德（242），同囝囝猷龍揸fit嘅新濠（200），股價噚日分別急挫6.2%同9%，而猷龍隻新濠就最唔爭氣，股價錄得近5個多月嚟最大單日跌幅，仲係3年半新低。

超瓊唔回應

話晒老竇嘅澳博今日上市，唔係話要信德同新濠嘅股價勁升，但表現都唔好咁失禮，影響投資者信心。話說回頭可能係有心人沽貨套現，等澳博上市時換馬買入，嗱咁就唔係咁講喇！
不過超瓊噚日就代父出席香港歷史博物館「天馬神駿」展覽開幕禮時，連出口撐老竇都冇，將傳媒提問交晒畀一齊出席開幕禮嘅澳博行政總裁蘇樹輝回應，自己一於專心睇展品。蘇樹輝話，好歡迎法院嘅判決，澳博會如期上市，就算十姑娘變招再嚟，佢都唔擔心會受影響，對股價表現有信心。對於「抽飛」情況，佢話係意料之內，情況唔算嚴重。
另一邊，賭王四姨太梁安琪喺下晝六點左右，同羅德丞太太及另一名女友人現身中環置地廣場L'ATELIER餐廳嘆茶，現場見佢心情好好，一啲都冇為賭王擔心。問佢澳博今日上市會唔會慶祝？佢只笑話：「呢啲公司會有安排㗎啦。」
一向好齊心嘅賭王一家，似乎唔太為澳博着緊，唔通佢哋都知道賭王見慣風浪，對澳博上市胸有成竹，所以根本唔使擔心？

電郵：mailto:[email protected]