奧巴馬的競選團隊傳承咗克林頓陣營嘅技術與精神，競選時出招抹黑羅姆尼，羅姆尼呢位摩門教徒，一生不飲酒精與可樂，似足唐英年係富二代，唔識講大話，面對抹黑指控，例如交稅嘅稅率低於普通人（按：係稅率，不是稅款），羅姆尼做Bain Capital，與華爾街同一鼻孔出氣（按：奧巴馬第一次當選時，華爾街係佢嘅捐款大戶）；美國富翁交稅少，對普通人民唔公道，羅姆尼就係富翁，維護富翁利益。九月民主黨大會之後，奧巴馬陣營集中用電視廣告攻擊羅姆尼以上幾點，令羅姆尼民望下滑俾奧巴馬拋離，十月首場辯論之後羅姆尼雖然追番唔少，但最後還是難以反敗為勝。
競選過後，美國國稅局（IRS）發表統計數字，顯示奧巴馬陣營所言，斷章取義，講大話唔駛眨眼，但佢地已經當選，鬼叫羅姆尼陣營唔識即時還擊、澄清咩！
美國納稅人之中，年入一百萬美元或以上者（簡稱百萬富翁）嘅平均交稅率，以2010年數字計，係20.48%。年入三萬至五萬美元者（簡稱平民）嘅交稅率係4.8%。年收五萬到十萬美元者，交稅率係7.7%。
由此數字可知，百萬富翁交稅率係平民嘅四倍，但由於超級富豪畢菲特故意誤導人民，話自己嘅交稅率係17%，低過佢嘅秘書，奧巴馬就故意以偏概全，大肆宣揚貧富不均，富翁交稅少，打擊羅姆尼。現在面臨財政懸崖，奧巴馬與民主黨堅持向百萬富翁加稅，共和黨堅持不加，有排拗，雙方隨時談判破裂！
睇番香港，梁振英在選委會投票前明知自己山頂大屋有僭建，與唐英年辯論時，還面不紅，耳不熱地指控唐英年大宅有僭建，誠信有問題，其膽子之大，說謊技巧之精，直情係世界級水平，與奧巴馬陣營之競選招式不遑多讓。香港有此人物，2017年特首有直選嘅話，其他陣營輸硬，何況梁特首像奧巴馬，競選連任有主場之利，白宮與國務院可將利比亞賓加西美國大使被殺事件嘅真相拖延至總統大選後先至逐點逐點揭露，你估梁特首唔會將2017直選方案/方法寫到盡量有利禮賓府主人咩！如果主人係唐英年，或者會笨到不屑為之，但當今主人係梁先生噃，識講「處理了就不是僭建」呢句名言，你地諗嘞。