韓國大受歡迎嘅親子節目《超人回來了》，早排走咗宋一國同三胞胎囝囝，加入李凡秀一家，觀眾呢頭都未傷心完，點知轉頭又傳出節目組斟緊《IRIS》男星鄭俊浩帶埋佢2歲嘅寶貝仔加盟，消息一出即刻嚇親班粉絲，擔心下一個退出節目嘅家庭會係盛傳多時嘅秋成勳同千金小愛，又或者李輝才同孖仔。

對於傳聞，鄭俊浩方面承認的確有收到《超人回來了》嘅邀請，「不過係去年拍攝劇集《甜蜜殺氣的家族》期間嘅事，當時因為檔期問題推咗，之後都冇傾。」而《超人回來了》節目組亦派定心丸，指最近冇再搵鄭俊浩。