當年今日
關於我們

【黑歷史】美斯18歲慘遭性騷擾 節目男主持摸完下體又揸籮柚

蘋果日報 2020/05/25 12:10

巴塞隆拿西甲阿根廷性騷擾Not 2 without 3

踢緊西甲巴塞隆拿嘅阿根廷球星美斯,絕對係當今球壇嘅一代球王,細細個嘅佢已經好受球迷歡迎,好得人鍾意。最近網上又傳返2005年,18歲嶄露頭角嘅美斯,喺家鄉阿根廷參加電視台節目嘅時候,被班主播上下其手嘅片段,嗰幾位仲要係男主播嚟,真係慘慘豬!
美斯喺04年10月首次為巴塞一隊上陣,被視為明日之星,佢獲邀請參加阿根廷電視台一個叫《Not 2 without 3》嘅搞笑節目,當時度過18歲生日冇耐嘅美斯仲一臉青澀,仲未上位成為球王,受到呢啲對待都唔敢出聲。喺節目期間,美斯不斷畀幾位男主持刻意咁摸下體,講講吓又將隻手放去佢褲襠;另一位主持趁住美斯同人攬緊嗰陣,大大力揸佢屁股;仲有位係咁搣佢面珠墩,攬住佢嚟錫,有一幕仲想除佢件衫㖭。雖然美斯不斷反抗,想避開呢啲行為,但始終都唔敢出聲講唔好。
嗰陣呢個節目喺阿根廷好受歡迎,專登安排喺黃金時間出街,仲攞埋阿根廷幽默大獎,但唔知呢啲性騷擾橋段到底係想惡搞美斯,定啲主持人真係咁鍾意佢。節目喺冇耐之後仲執埋㖭,希望美斯當年冇留低陰影喇。
今時今日嘅美斯已經係巴塞嘅icon,舊年佢仲話過自己想喺呢到踢到退休,點知原來佢都曾經諗過離開巴塞,就係因為當年嘅逃稅事件,搞到佢仲想離開發展咗咁多年嘅西班牙。是咁的,2016年夏天美斯同老竇畀西班牙當局起訴佢哋涉嫌瞞稅,懷疑佢喺06至09年期間瞞稅超過400萬歐元,即大約有4,200萬港紙咁多,真係一身蟻喎。但美斯就話冇啲咁嘅事,兼且拿拿聲畀返幾百萬歐元還稅,但都係搞到上法庭,對呢位球王嘅形象都好大影響吓。
美斯就話,嗰陣搞到咁亂,佢真係想走,唔單止係離開巴塞,係直頭想離開西班牙呢個傷心地。佢覺得自己遇到唔公平嘅對待,搞到佢唔想再留喺到,但係個個都覺得佢會留喺巴塞,根本冇人問佢價,開合約畀佢。外面嘅人唔知道咩一回事,美斯啲仔女又仲細,嗰陣真係對佢同屋企人嚟講都好困難。
------------------------------
App內1-Click訂閱《蘋果動新聞》
按此了解更多
------------------------------
《體蘋果》陪你睇波講波
https://www.fb.com/appledailysports