【新增內容】

今日係17/18年度馬季開鑼，喺沙田馬場星光熠熠，許晉亨、趙世曾與女伴、王晶及威利等演藝界人士相繼現場，連特首林鄭月娥亦首次以特首身份出席，負責進行打鑼儀式及擔任第3場「特首盃」嘅頒獎嘉賓。（註：林鄭以往曾代替前特首梁振英出席打鑼儀式）

約下午兩點半左右，第3場賽事完結後，趙世曾與着住deep V大連身裙女伴十指緊扣咁離開，女方更拎住一袋外賣。問到趙世曾有冇贏錢，佢話：「贏咗少少啦！」再問到佢點用筆lucky money時，佢就話會俾朋友，但問到佢係咪會轉贈女友時，佢笑笑口冇答。當記者再請趙世曾介紹一吓身邊女伴，以及對方點樣稱呼之類嘅問題，趙世曾保持笑容，但就乜都冇講拖女伴離開。

到第4場，許世勳愛駒之一「獻惑」有份出賽，許晉亨現身撐，但就未見佢老婆李嘉欣現身。見到許晉亨落去沙圈與告東尼及任志剛等人傾偈，好開心咁。當有記者問到佢老婆，及囝囝許建彤（Jayden）入讀小一等問題時，許晉亨只笑而不語。

千呼萬喚，嘉欣喺第10場、即係佢老爺許世勳另一愛駒「估惑」出賽嗰場賽事前，終於現身！佢同許晉亨手拖手到場，問到嘉欣有冇信心拉頭馬，佢只係笑一笑，冇答案。之後「嘉亨」一齊落沙圈同告東尼及騎師莫雷拉傾偈，而喺閒談期間，許晉亨全程用手搭喺老婆纖腰上，非常恩愛。「估惑」係今場嘅大熱門，不過未知同賽前突然落雨有冇關，「估惑」最後大熱倒灶，包尾收場，相信企喺包廂外觀賽嘅「嘉亨」都大失所望。