太陽娛樂公司老闆周焯華（洗米華）因為搭上名模Mandy Lieu，搞到同老婆陳慧玲（Heidi）感情出現好大裂痕，老婆已簽紙要離婚，但洗米華經過成年嘅努力，終於令老婆取消離婚念頭，挽救到頭家唔使散晒，呢輪見佢個大仔周柏豪經常放老爸同Heidi互動嘅片出嚟，可以睇到洗米華同老婆感情好好，早兩年聖誕節，洗米華都去咗英國陪Mandy，今年竟然有人見到佢留喺澳門過，冇去英國。兩公婆一齊打韆鞦，又教細女周善潼(Damiana)盪韆鞦，睇到佢哋真係冇晒芥蒂，畢竟之前洗米嫂出現公開場合，次次都刻意同老公保持距離。

今日周柏豪就貼咗一條片，片中佢哋喺超市入面，唔知係咪買定嘢準備今晚開party。不過未買嘢食之前先鬥力氣，身形fit爆嘅洗米嫂，即場接受阿仔柏豪挑機，喺超級市場內比試下腰力同腳力，柏豪留言︰「gym at……」仲tag寫住leg day，片中洗米嫂孭住3歲細女善潼，而阿哥柏豪就孭住16歲嘅阿妹梓潼，周柏豪提出要做十下深蹲，3歲同16歲嘅體重相差咁多，洗米嫂就做得好輕鬆，周柏豪顯得好吃力，佢仲負責數做咗幾多下，每叫一下，佢都好吃力咁數，而佢身後嘅梓潼就笑唔停，仲豎起姆指，周柏豪就忍唔住話︰「好重。」結果不敵洗米嫂，條片由洗米華個家姐拍嘅，喺條片仲聽到洗米姐旁白︰「點解喺超級市場發生呢啲事？我返樓上食嘢喇，呢度係超級市場，o依四仔乸係咪低能！」

精選娛聞，喺晒《娛果》
http://fb.com/appledailyent