季尾友賽確無謂
求驗客手記:球員怕傷難見真章

蘋果日報 2002/03/26 00:00


世界盃四年一度當然好重要,不過喺三月尾呢段聯賽同埋歐洲賽埋門衝刺嘅階段,定一個國際友誼賽賽期嚟畀參賽隊伍試陣,我求大俠就覺得有啲無謂喎!睇番禮拜三英格蘭同意大利喺艾蘭路交手場波,球迷都唔使旨意見到一班正選球員會打真章。
英格蘭領隊艾歷臣噚日就話到明,只會畀班主力球員好踢半場波。呢位瑞典教頭點解要咁做,可能係受到一眾列強的話事人嘅壓力,驚班球星傷咗,影響球會成績!正所謂閒時唔燒香、臨急抱佛腳,要試陣都唔係等到三、四月先試啦!
重有呀,如果啲領隊或者教練真係要試陣,淨係畀班球員踢得嗰三、四十分鐘,場波重可以換十一個後備,邊度試得到個效果出嚟吖!
其實,若然可以將啲球會級賽事縮短或提早進行,咁咪唔使搞到啲球員同埋啲教頭左右做人難囉!

利物浦爭標佳兆頻現
利物浦真係一世夠運,靠史米沙完場前搞掂車路士,重要適逢爭標勁旅阿仙奴件猛將皮利斯啱啱宣布提早收咧,睇嚟紅軍真係好有機會攞走呢隻超聯冠軍獎盃。我求大俠今次跌眼鏡,估唔到原來雲格冇吹水之餘,重要係吹細咗皮利斯傷勢㖭。

伏美人暗戀過范將軍?
財神爺同埋伏美人呢單忘年戀,最近成為中港市民茶餘飯後嘅話題,不過就搞到中國國家隊隊長范志毅唔多高興。因為竟然有報道指伏美人暗戀過范大將軍!唔怪得曾喺英、蘇效力嘅范大將軍話:「佢哋拍拖關我乜事呢?重話伏明霞暗戀過我,真係無奇不有!」佢重話估唔到英國小報鍾意吹水嘅風氣,原來已經吹到嚟亞洲。
76人有麥基冇有怕
76人冇咗主力艾華遜壓陣後知道形勢不妙,係噚日場波拿拿臨派咗足足唞咗二十三場嘅麥基出場,結果呢位上季嘅最佳第六人攞咗十二分,76人今季亦第一次喺少咗艾華遜贏波。其實一隊波冇永遠靠一個人「食胡」,睇嚟76人嘅擁躉都唔使咁擔心啦!

阿武羅素冇紀律
多蒙特前鋒阿武羅素喺禮拜日對科特布斯場德甲聯,唔滿意教練森馬換佢出嚟,足足擾攘咗成兩分鐘先肯離場。唔使問,肯定係阿武羅素唔着啦,事關佢做得球員,就應該服從教練嘅命令,冇權自把自為。但係另一個角度嚟睇,呢件事反映咗森馬駕馭唔到隊中嘅大牌球員。如果換轉係曼聯嘅老費,我求大俠包保阿武羅素好似隻死狗咁行出嚟。

挽留積遜用美人計
今年五十有六嘅湖人教練積遜,早排話明喺○三至○四年球季約滿之後就告老還鄉,連奧尼爾都話要同佢一齊退休,到時湖人肯定步公牛後塵,由班霸變魚腩。其實湖人要留住積遜好容易啫,只要班主畢斯畀佢位同積遜拍咗兩年拖嘅乖女珍妮絲嫁畀佢,到時閉門一家親就好易話為啦!計我求大俠話,既然香港有「松霞」相差二十七年嘅忘年戀,「積珍」相差不過十六年嘅半忘年戀又有何不可?