【新增影片】
曼聯會喺「拆禮物日」嘅英超賽事主場迎戰般尼，紅魔鬼領隊摩連奴賽前向對手笠高帽，指般尼絕對有能力爭取來季參加歐洲賽嘅資格。

或者你會覺得點解最近好似喺第二個人口中都聽過呢番類似嘅說話，你無錯㗎，因為熱刺領隊普捷天奴上星期的確曾經咁樣講過。話說熱刺上場聯賽作客般尼之前，普捷天奴就起勢咁讚對手，結果係點？咪就係熱刺作客贏般尼3:0囉。

講番摩佬，唔知佢係咪見熱刺呢招好使好用，所以鬥般尼賽前又向對手笠高帽：「般尼嘅狀態真係無得頂，如果護級係佢哋嘅目標，我諗呢樣嘢已經搞掂㗎喇，佢哋完全控制咗局面。如果般尼嘅目標係前10名，我覺得佢哋都會做得到，如果目標係踢歐洲賽嘅話，般尼係絕對有得爭，所以呢個對手真係唔容易應付㗎。當你將佢哋依家嘅成績同季初嘅目標比較嘅話，今季對般尼嚟講真係一個好好嘅球季。」

--------------------
BFB CHAMPIONS 2.0 聖誕新年活動連環出擊，登入即送傳奇球星「林伯特」！ http://bit.ly/2xrTKGM