當講呢句嘢嘅人都要痞監，你就估到，作為平凡人的我，喺假期前後，仲要咁鬼凍，要幾掙扎先起到身返工。

返工，就好似睇電影。

一齣好戲，你啱啱睇完第二次，已經急不及待睇第三次，越睇越有味道。

一齣爛戲，你最多頂25分鐘，跟著你會無故去廁所，跟著你好想割凳，或者打爆個芒。

好戲超難得，睇十套片都未必睇到齣好嘅。爛戲常常有，不過既然係爛，就可以隨時撇。

最慘係大部份片，既唔算精彩，又唔算太爛，總之就係中規中矩，無乜厘頭，冇乜意思，但又未使割凳。你唔覺唔覺，坐下坐下，無無聊聊，咁就睇完齣戲。之後問番你有乜感想，你話唔知。問你好唔好睇，你話麻麻。唯一肯定發生過嘅，係你用咗100分鐘睇完齣戲。

呢個就係我每日返工嘅寫照。

咁當然，返工係有錢收。喺律師樓返工，銀両唔少，仲好似有啲身份、地位。但大家彷彿忘記咗，最重要嗰樣嘢，時間係有限嘅。

每個人嘅追求唔同。有人鍾意睇驚嚇片，刺激腎上腺素上升。有人鍾意溫情片，講求人情味。有人鍾意懸疑片，動下腦筋。有人鍾意開懷大笑。有人鍾意略有所思。每個人喺唔同階段，追求嘅嘢亦唔同。後生時，鍾意睇驚嚇片，驚嚇你唔死；老咗睇番啲溫情片，平平淡淡，但又言之有物。不過，既然得100分鐘，何必睇齣連你都認為無聊嘅戲呢？

咁又當然，你買飛之際，係以為自己揀咗齣啱睇嘅戲。啲影評呀、身邊嘅朋友呀，仲大力推薦。你唔入到戲院，都唔知齣戲咁樣樣。但如果睇咗25分鐘，知道搭錯船，就要即時醒覺。

人生係有限公司，冇人保證你有第二個100分鐘。揀齣──你睇完唔會後悔嘅電影，搵份──你真心想番嘅工作，係我衷心希望自己能做到嘅嘢，亦係我由衷希望大家喺新嘅一年能做到嘅事。

套用我最喜愛電影《月黑高飛》（Shawshank Redemption）其中一句經典對白：「Remember Red, hope is a good thing, maybe the best of things, and no good thing ever dies.」祝福大家心想事成。

叫我豆豉 @ 法政巴絲

法政「巴絲」－法律界的「巴打」和「絲打」。不知絲襪奶茶，配以豆腐火腩飯，會是怎樣的味道？當浪漫的男人，遇上活潑的女孩，又會擦出甚麼樣的火花？讓法律界的朋友一起來，同大家赤裸裸 gossip 呢行嘅八卦趣事。

【minigame】2017瘋暈人物 返工打機唔使擇日
http://bit.ly/2CeWQkP