今年28歲的歌手徐加晴（Rona），一直工作不多，但從沒放棄音樂夢。有夢想，也要生活和養家，她之前曾在油站當兼職，現時亦身兼兩職。雖然生活逼人，但她每年也有新作品推出，可惜最近見她在社交平台發聲明，表示與舊公司解約。

「其實一開始對方都好幫忙，大家因為緣份而結識，然後合作，但期間工作態度，或者大家的理念好唔同，磨合唔到，所以最後都要解約！」她慨嘆。

自資出歌 自己行台

音樂人張佳添的徒弟徐加晴，17年憑一曲《大概大概》出道，不過娛樂圈競爭大，與很多樂壇新人一樣，演出機會不多，每月收入亦不穩定，但就算要做兼職來賺生活費，她亦繼續追夢。

不過最近她透過律師與舊公司解約，「我嘗試同對方和平解決問題，但最後都唔能夠好好討論，我研究過其實雙方合約已完成，我曾經提出，但對方唔太同意呢件事，其實一直以來，除咗第一首《大概大概》同《封箱》外，往後嗰啲作品都係自資推出，例如行台或者上電視做訪問，所有工作也由自己負責，或者有朋友幫忙！」

大家絕對沒有聽錯，作為歌手Rona自己「行台」，豈不是很吃力？徐加晴坦言：「當然好吃力，真係要逐個逐個打電話，自己去電台搵DJ介紹新歌，當然呢個過程都係學習，係必經階段，自己係今次事件上亦成長唔少。兩年前初出道時候，所有事情都唔識，但經過近兩年時間，經歷好多唔同嘅嘢，覺得自己可以行台、錄歌、作曲同填詞，其實得益唔少！」

每件事也要親力親為，她慶幸沒受行內人白眼。

「大家都見到我做好多唔同工作，努力儲錢，就係希望可以做歌，一啲長輩，甚至呢一行朋友，大家也會用心去幫我，或者會睇吓有啲咩貼士話畀我聽！」

茶餐廳收工再去賣衫

徐加晴現在每天做兩份工作，在茶餐廳收工後，就去當售貨員。

「我依家已經辭咗油站工作，因為我搬咗屋，如果再喺嗰度返工車程會好遠，所以我依家轉做茶餐廳同時裝店售貨員，當然都係好辛苦，茶餐廳係我做過嘅工作中，最辛苦嘅一份，我覺得比油站工作更辛苦。」

第一日在茶餐廳工作，她甚至因工受傷。

「因為唔知道要穿着一對防水鞋，我第一日返工淨係着咗一對波鞋，然後地下有一灘水，我就跣倒，直到依家條尾龍骨都未好番，情況都幾嚴重，因為嗰刻我痛到攤咗喺地下兩、三分鐘都起唔到身。」

原來在茶餐廳工作，比在油站工作更高難度。

「我覺得不論落單定抑或外賣，同時間要多功能，又要應付Foodpanda，然後又要負責收銀，有啲人又要求分單，令我感覺好頭痛。有時候拎一啲熱湯或碗碟，一隻手要拎好多嘢，對我來講係好辛苦。而喺油站工作只需要拿着油槍，我記得最辛苦只係要搖擺油槍喉，因為好重，同時千萬唔好唔記得關上油蓋，而喺油站工作，最驚就係熱，茶餐廳就比較涼，因為有冷氣！」

雖然兩份兼職令徐加晴筋疲力盡，但勝在一分一毫都不用靠人，而與舊公司撇清關係後，她更可以安心走自己想走的路。

----------------------------

壹呼百應 號召有心人 請香港人睇壹週刊

按此了解更多

----------------------------

APP 內訂閱 《壹週刊》

1Click 搞掂 輕鬆簡便

按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現！