唔少人成日批評副局長同政治助理人工高兼冇嘢做，噚日佢哋就空群而出，用行動證明佢哋有落區。身為虔誠基督徒嘅蘇錦樑做召集人，邀請多個副局、政助，包括譚志源、許曉暉、梁鳳儀、伍潔璇、葉根銓同盧奕基等，齊齊戴住聖誕帽落區報佳音，坐住電車由跑馬地唱到西環。
最特別之處係佢哋邀請埋保良局嘅小朋友一齊參加，而且人人都有禮物收，真係滿載而歸。其中伍潔璇好落力，除咗帶埋自己兩歲囡囡參加，母唱女隨之外，仲親手整曲奇餅送畀小朋友。據聞呢次活動由副局同政助夾錢舉行，唔係出公數，由於未埋數，所以唔知每位要夾幾多錢。