有「Trot女王」稱號嘅38歲韓國演歌女歌手張允貞，19歲出道，於2004年憑專輯《天啊！》爆紅，一度成為韓國演歌歌手中身價最高嘅女星。張允貞多年來將所有收入交畀媽媽保管，媽媽卻拎晒去畀兒子做生意，生意又以失敗告終，令張允貞爆紅後10年間掙嘅近73億韓圜(約5,291萬港元)冇晒，更被媽媽用佢嘅名義借錢，搞到佢反欠債10佬韓圜(約724萬港元)。外界有指張允貞母親嗜賭成性，亦係敗光財產嘅主要原因之一。

由於母親嘅所作所為，張允貞與母親關係跌到冰點，雖然其母大前年透過媒體表示向與張允貞和好，但母親再令家事公開化嘅做法令佢感到負擔，直到依家兩人關係仍然好差。而今日有報道指，張允貞母親再因金錢問題被警方起訴，引起網民熱議。報道指張允貞母親於2015年至去年，向熟人A某前後借咗合共4.15億韓圜(約300萬港元)，但一直冇還過錢，A某就於去年尾起訴張允貞母親涉詐騙。張允貞母親承認有借過錢，但否認詐騙。

更多韓流，喺晒《娛果》
http://fb.com/appledailyent