累積銷量大賣3,000萬本嘅日本漫畫《死亡筆記》,當年拍成電影後大受歡迎,帶挈當時只係新人嘅松山研一同埋戶田惠梨香走紅藝能界。雖然大家對電影版夠晒經典,無論藤原龍也扮演嘅夜神月,抑或松山研一飾演嘅L都深入民心,但日本NTV電視台仍信心十足咁將《死亡筆記》開拍成全新連續劇,鐵定7月開播。
電視台起用人氣一般嘅26歲男星窪田正孝大旗扮演夜神月,20歲上位男星山崎賢人就演L,今日終於有兩位男主角嘅造型曝光,始終珠玉在前,難免又例牌被網民柴台,而且松山研一、戶田惠梨香各自有新劇同季推出,各方面都對呢套新版《死亡筆記》不利。
劇集版監製拍晒心口話會炮製出大家耳目一新嘅《死亡筆記》,所以電影版冇出現過嘅L接班人N都係主角之一。至於N一角係由曾參演日劇《海女》、電影《要聽神明的話》嘅16歲偶像優希美青演出,今年初佢因為身體不適暫停工作,如今正式復工就挑戰呢個中性角色,不過廣大網民就對佢嘅N造型唔多欣賞。