(新增回應)

自從15年同「的士陳」陳偉霆分手後，今年34歲嘅阿Sa，dry足兩年，上個禮拜終於開齋，被爆同連詩雅(Shiga)前男友「百億麻雀館太子爺」石恆聰(Anthony)拍拖，日前阿Sa出席活動回應事件嗰陣，全程仲講咗5次「我好開心」，睇嚟佢真係sweet到爆咁噃！(新聞連結： http://bit.ly/2twqQ9q )

自言「一把年紀」嘅阿Sa，搵到Mr.Right當然要打鐵趁熱，有機會就盡量享受二人世界，噚日(2日)有讀者李先生就透過《蘋果》「爆相爆片」，喺噚日上晝約8點45分，見到阿Sa同男友Anthony，坐CX548由香港飛東京羽田。李先生表示：「嗰朝見到戴住cap帽口罩嘅阿Sa，未上機前，就同男友坐喺近機艙門口嘅長櫈，阿Sa就喺度食麵包。到下晝約兩點，佢哋喺羽田機場等過關時，阿Sa同男友沿路都有傾有講，有講有笑。不過阿Sa見有人望佢，佢就會擰歪面有啲避忌。之後阿Sa男友就喺行李帶等行李，阿Sa就先去過關嗰度排隊等。出閘後，有一個着白衫嘅中年男人接佢哋，又幫阿Sa推行李上2樓便利店買嘢食，之後落返一樓再去停車場方向攞車！」

從讀者提供嘅短片中，Anthony過關時都冇同阿Sa有親暱動作，直至出咗羽田機場嘅入境大堂時，終於忍唔住攬實女友條腰，又搭女友膊頭，非常之咁sweet。

雖然同男友拍拖只係短短數月，不過據知阿Sa早已融入男友家中，對於有冇機會閃婚？阿Sa之前喺活動回應就話：「下一秒都唔知發生咩事。冇諗咁多，活在當下，講完。」似乎暫時都仲享受緊拍拖蜜月期嘅時光。

阿Sa被讀者「爆相爆片」拖百億男友蜜遊東京，短訊回覆：「呢啲唔講咁多喇，多謝關心。」