雲格同摩連奴一向唔妥，但講到最近曼市打吡賽後嘅更衣室風波時，突然諗番阿仙奴13年前對曼聯賽後發生過嘅Pizza事件，好似感同身受咁同情摩佬遭遇。

摩佬賽後傳因為不滿曼城贏波後喺奧脫福大事慶祝，踩入客隊更衣室叫佢哋唔好咁嘈，點知令到兩邊職球員發生衝突，而摩佬仲要畀客軍球員用空水樽掟中兼有牛奶飛到佢身上，十足十同當年紅魔前領隊費格遜一樣，顏面食中法比加斯飛掟嘅Pizza。

經歷過呢種場面嘅雲格，就對曼市打吡賽後衝突有以下睇法：「呢啲衝突發生喺打吡賽後，都唔算新奇事，咁樣先襯托到場波幾咁重要，有時大家都好緊張，對贏輸睇得重，雙方有啲過火都難免。呢種情況發生過喺我哋同曼聯身上，有時大家都想100%專注喺場內就算，賽後大家就變番天使，但冇可能。所以點解我喺日本教波時，好鍾意相撲呢種運動，因為相撲手贏咗唔會叫囂，佢哋唔會太過開心，咁樣係對對手唔尊重，但我知呢種文化又同足球唔一樣......」

佢亦似乎放下同摩佬恩怨，反而覺得曼城有啲過份：「當你輸咗場大戰，見到對方100%咁去慶祝，你會好難受，呢個係一種有啲挑釁性嘅行為。」

--------------------
球迷一定要知！英超一哥曼城，已經登陸​『BFB​』​！登入即送藍月球星： http://bit.ly/2AAiPDS