甄妮姐姐一連三場嘅「甄妮愛Show世界巡迴演唱會（完美篇）」噚日（18日）正式開鑼，噚晚頭場，佢一出場就以火紅色晚裝性感登場。

全晚甄妮姐姐都大賣性感，最性感一套衫就係中門大開嘅白色高叉長裙，晒胸又晒腿，性感程度分分鐘勁過o靚模Pheobe。不過甄妮一於好少理，又跳又唱，令到心口嘅膠紙移位，成塊肉色膠紙跌咗出嚟，性感係好性感喇，不過美感就.....20日尾場就係甄妮姐姐嘅60歲生日正日，60歲嘅嚟講，其實佢都算Keep得唔錯喇。

另外，早排同G.E.M.隔空對罵嘅佢，全晚不斷講嘢有骨，而嘉賓張敬軒就好識做，不斷賣口乖，大讚甄妮。甄妮問軒仔點解唔著SEXY衫，軒仔就表示：「我比較保守啲，冇本錢，唔似妳。」甄妮就話：「唔係喎，你知唔知點解我叫做巨肺呀？其實當年霑叔係想叫我做巨胸，但係佢想送文雅啲，所以改左個字叫巨肺，你係咪用肺唱架？我呢就用丹田，用喉嚨用心去唱，邊有人用肺唱歌o架？不過又奇怪，依家有大肺，中肺同小肺細肺，個肺有咁多SIZE真係好奇呀。」莫非今次茅頭直指曾翻唱G.E.M.嘅《A.I.N.Y.》、有「小巨肺」之稱嘅林欣彤？

軒仔繼續大讚甄妮姐姐：「綵排近睇佢冇皺紋，捉你隻手仲覺得似廿零歲咁滑。」氹到對方笑到四萬咁口話：「唔駛拍馬屁喇，除咗手第二度仲滑，落咗台先講。不過，我哋要學多啲禮貌，唔止對我，係對所有人都要。」