當年今日
關於我們

股壇瀏覽器:新醫藥有人歡喜有人愁

蘋果日報 2002/11/30 00:00


期指結算過後,港股即見回軟,恒指收報10069,跌77點,但成交增至逾80億元,主要因為好淡雙方續以滙豐(005)作為戰場對撼,但滙豐仍升0.55%,收報91.50元,成交增至13.8億元。另外,市傳噚日盈富(2800)入市吸納中銀香港(2388)及思捷環球(330),令兩股成交分別增至9.75億元及2.92億元。有人話出手掃貨嘅經紀係高盛,不過亦有人話高盛明知盈富會買貨,故此入市托高個價沽貨畀盈富。
不過,噚日市場焦點並非滙豐,而係爆煲股新醫藥(8085)。雖則話此股一度跌近99%,但據聞唔少散戶低位入市博反彈,有人賺到笑,以低位1.6仙反彈至收市27仙,反彈幅度近15倍,重好玩過當年小小超收購得信佳後首日復牌。新醫藥成交金額有近億元,絕對唔係乾升乾跌。不過後市情況,當然不能太過樂觀。
至於新醫藥因何大幅下挫,市場眾說紛紜。據黑客話,此股上市時,街外其實冇乜貨,幾乎全部由炒家接晒並以孖展按倉,股價一直維持在1元以上水平,其後證券行施壓要求轉倉,但因為炒家與證券行傾唔掂數,證券行想將佢斬倉,但公司「巧合地」停牌,令證券行無法斬倉,由9月底停到噚日至復牌,證券行有理無理第一時間沽貨,但相信就幾難收番條數。據聞大股東手貨未有抵押,有可能會入市趁低吸納。

中華燃氣快開車
中華城市燃氣(603)近期表現及成交都不俗,據Cookie話,此股貨源已收得七七八八,就快會開車,下一目標價0.14元。據聞最近有基金客對此股甚感興趣。
阿虎