紅磡碼頭喺星期三下晝5點幾，出現咗一位奇怪嘅「划艇叔」，佢划住隻木製小艇喺碼頭對開海面漂浮，睇真啲佢隻艇係溶溶爛爛嘅，仲穿咗窿入緊水添。企喺碼頭嘅熱心市民見到咁，都戥呢位划艇叔牙煙，仲即時拋水泡同繩畀佢，最後將佢救返上碼頭。

街坊麥先生當時行經碼頭，佢話初時都唔知咩事，但見到碼頭有人解開掛喺石壆旁邊嘅水泡，佢於是望向海中心，就見到呢位划艇叔喺度划艇。麥先生話見到划艇叔好努力咁，想將隻艇划返埋碼頭，但就被海浪推返轉頭，隻木艇溶溶爛爛，艇上好多垃圾仲穿咗窿入緊水，情況都幾危急。

就係呢個時候，碼頭嘅熱心市民將水泡同繩拋畀划艇叔，划艇叔於是伸手用船槳將水泡拉埋自己身邊，最後佢終於返番去碼頭石級邊上岸。划艇叔仲想將隻艇拖埋上岸，但有途人就話佢隻艇咁多水邊拖得上嚟，結果佢無辦法，將隻艇用繩綁喺碼頭石躉。

麥先生事後問過划艇叔點解喺碼頭對開划艇，但划艇叔只係話佢喺尖沙嘴划到過嚟，其他嘢就唔肯多講。麥先生初時以為划艇叔喺海面執垃圾，但見隻艇爛成咁，就懷疑隻艇係颱風過後，唔知邊度搵返嚟，總之覺得成件事好莫名其妙囉。

你敢爆，我敢獎！ 立即WhatsApp《蘋果》24小時爆相爆片熱線 或致電：63836568