早兩年香港好流行動物傳心，直至有傳媒搵動物傳心師搵龜，不過係玩具膠龜，先至令部份人如夢初醒，知道動物傳心係流嘅。不過特區政府嘅眼光與別不同，教育局下設嘅生涯規劃資訊網站，原來一直有向同學介紹做動物傳心，好在教育界議員葉建源出聲，教局先至刪去有關資料。

葉建源呢次「成功爭取」都值得分享。佢喺社交網站話，有線新聞喺2017年已經試過搵動物傳心師去搵膠龜「布歐」，點知報道出街都兩年幾，教局嘅生涯規劃資訊網站仲介紹動物傳心師嘅職業資訊。

八方上過去生涯規劃網睇睇，可惜相關內容已經刪除咗。據葉建源描述，網站原本介紹動物傳心師嘅職責包括「以心靈感應與動物溝通、處理關於動物的各種行為問題、了解動物的想法並進行輔導、改善家長和動物的關係」，真係相當仔細。

葉建源認為教局應該提供準備、真實嘅生涯規劃資訊俾學生，如果網站列出啲懷疑造假、尚未驗證嘅行業資訊，可能會誤導市民。好在葉建源去信教局反映後，個網站就刪去有關動物傳心師嘅內容。大家可能好詫異點解教局咁都得，八方就只係驚訝政府竟然無將動物傳心結合埋一帶一路、大灣區嚟推銷啫。

-----------------------------
【武漢肺炎】專頁
全民自救 抗疫資訊盡在《蘋果》
-----------------------------
無懼警暴 學懂自救
《抗暴之戰●法例須知》讀果 上架