股壇瀏覽器:春江鴨等沽電力股

蘋果日報 2002/01/29 00:00


昨日58隻新輪登場,但港股依然淡靜非常,恒指先升後跌,微跌5點,收報10767,成交74.28億元,成交都算係暢旺。i師傅話成交暢旺主要係因為美林嘅藍籌程式買賣盤,一來一回成交因而多咗1至2億元。
大摩噚日力壓中移動(941),市場同時傳出中國將促使國內兩大移動電訊經營商實行單向收費,並會於短期內舉行聽證會,似乎中移動與聯通(762)農曆新年前都唔使旨意反彈咯。

藍帆有海域陰影
噚日藍帆科技(8166)宣布招股上市,市場關注主要股東海域集團(1220)幾時會減持,所以唔係太睇好此股,認購反應估計只屬一般。此股擬發行2億股新股,每股0.24元,集資4800萬元。據講海域手上嘅貨每股成本價只係2.34仙,難怪有人擔心佢會獲利減持。
國有股減持方案初步出台,深滬股市即插水,但華能國際(902)及北京大唐(991)等國家電力公司又再炒高,因市場又傳國家電力改革方案出台。Cookie話,其實美資佬兩個月前就知道呢單料同大約嘅公布日期,所以唔少基金早已入定貨,恐怕消息一出,會成為沽貨藉口多於買貨藉口,因為唔少電力股嘅股價已經到晒目標價,噚日電力股被掃高,聽講與發行備兌證活動有關。
英發(439)噚日宣布話搵人盡力以2.5仙配售6億股新股後,股價隨即急升23.8%,升至2.6仙收市,托價托得咁明顯,試問邊個敢要貨呢?黑客話班友重要抽高啲至會正式批股,可以搭吓順風車,不過風險大。