周柏豪被揭曾發表100萬人上街論 渣哥嘲笑現啜阿爺粒蓮
蘋果日報 2020/12/24 23:05
周柏豪陳百祥渣哥阿叻
周柏豪日前接受陳百祥（阿叻）主持的親中網媒訪問，發表「阿媽教仔」論被網民狂轟，指摘柏豪為人民幣跪低，出賣良心，大批fans對柏豪失望，粉碎偶像CD割席，柏豪的IG短短兩日急跌逾3萬追隨者；有網民翻摷柏豪的「黃絲歷史」和「黑歷史」，發現當年柏豪曾接受由林日曦、陳強、阿Bu出版的《黑紙》訪問，主題是「吹咩」，片中柏豪說：「會上街嘅香港人係有呢個信念。」
柏豪於2007年入行，橫掃四台頒獎禮新人獎，2012年在九展舉行首個演唱會，同年接受「黑紙」的訪問，當年柏豪是非纏身，包括：（1）傳與陳山聰爭奪賭王千金何超雲，兩男在微博爆罵戰，其後超雲選擇了山聰，在微博向柏豪開火；（2）因為一篇「玻璃杯」潮文，被網民封為「大文豪」;（3）在巴黎與女途人合照，惹出扮粉絲風波。
當年柏豪接受《黑紙》訪問，首先講到負面新聞，柏豪自認被人越插越high，「網上負面嘅留言傳到我度，我自己已經去到嗰種有少少亢奮嘅狀態，譬如upload一個片上去，都會被人插被人抨擊，其實我係幾high嘅，有少少變態，因為佢要有睇過，佢先會評論到我，咁你睇過，就係我要嘅嘢。」
被問到他的黑色信念是甚麼？柏豪說：「雖然吹咩呢句說話，做到之後唔會喺嗰個人面前講咁賤格，但信念永遠都係咁，你十年前覺得我做唔到唔緊要，我會喺短短時間內話畀你聽，我會努力去做到，如果嗰個人用同一個概念向住我，我會拍手示意做畀我睇，如果佢做到嘅話，我都開心㗎，因為我同佢距離越嚟越近，咁我咪又要再進步超越佢，都係一個幾好嘅作戰方法。」
柏豪更進一步講到他的「吹咩」信念，「會上街嘅香港人係有呢個信念，有20萬，你話8萬，ok，下次又再多啲，有50萬，你又話得8萬，ok，下次100萬呀，有某部份人有呢種心態，但有部份人會『唔好搞咁多嘢啦』、『好熱㗎』，怕犧牲...但我自己處事係工作又好，生活又好，我覺得一定要有取捨。」最後，他向着鏡頭說：「我係周柏豪，我嘅黑色信念係吹咩，別人笑我太瘋癲，真實的我更瘋癲。」
這篇「黑紙」訪問，昨晚被網民廣傳，渣哥都貼上社交網嘲笑柏豪：「別人笑你太瘋癲！你就啜阿爺粒蓮？#一條X頭的誕生」網民亦隊穿牆：「我係周柏豪，我嘅乞食信念係吹咩，別人笑我tvb，真實的我rmb。」
周柏豪於2012年接受《黑紙》訪問，自認被網民越插越興奮。（短片截圖）
當年對着鏡頭大談上街論。（短片截圖）
周柏豪：「下次就100萬人上街！」（短片截圖）
周柏豪當年已講出心聲：「別人笑我太瘋癲，真實的我更瘋癲。」（短片截圖）
渣哥譏笑柏豪：一個X頭的誕生。 （網上截圖）
何超雲當年曾在微博暗寸周柏豪。（資料圖片）
周柏豪當年在巴黎街頭與女途人爆合照風波。（資料圖片）
周柏豪被女途人在網上撰文寸爆。（資料圖片）
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！