日本女歌手hitomi當年以索爆形象走紅J-pop界，就快滿40歲嘅佢日前應綜藝節目邀請公開私生活，帶埋第三任老公同埋一對仔女上電視，hitomi自爆9個月得意囝囝開始出牙仔，當佢餵人奶時就被咬到好痛，認為囝囝係時候戒奶。

hitomi上年5月同開地產公司嘅現任丈夫結婚，雖然hitomi經常喺blog晒恩愛，不過老公上節目就係第一次，引嚟唔少觀眾大讚老公非常有型，亦有網民話似翻版裴勇俊。至於節目出街後，hitomi卻惹來指責，原因係佢對為前夫所生嘅6歲大女特別嚴厲，面對阿女食飯期間抑或去夏威夷旅行都扭計，hitomi對住鏡頭都冇留情斥責，被指唔識教女，又戥6歲囡囡可憐。

近日hitomi寫blog回應近日外界批評，佢解釋只係唔想縱容囡囡，其實無時無刻都顧及女兒感受，只是大家未必認同佢嘅教育方式，仲話為要做個好媽咪繼續努力。