求驗客手記:曼聯性醜聞乜乜乜
球場搵出五大疑犯
究竟邊個係曼聯性醜聞嘅主角?睇周日曼聯逼和韋斯咸1:1場英超,我求大俠特別留心,想睇吓邊位國際級球員表現怪異,希望可以搵到個答案。勞基梳爾十分鐘內兩黃一紅牌被逐離場,相信呢位十九歲英格蘭左閘最有嫌疑!
日前英國《太陽報》爆出曼聯嘅性醜聞,指有球員喺夜店廁所同個廿幾歲嘅女人性交,隊友就喺隔籬廁格偷拍,之後呢套由曼聯球員做主角嘅短片仲喺球隊更衣室度流傳。受咁大單醜聞影響,涉案球員喺周日對韋斯咸場波實會神不守舍!
除咗迪基亞依舊神勇之外,曼聯上半場踢得好差,進攻一潭死水,唔通醜聞主角係朗尼、法卡奧呢啲星級進攻球員?我求大俠諗,朗尼以前都偷食過,每次後果都好大鑊,全城轟動,相信佢都會識學精,就算係食,都唔會俾人留低罪證。當曼聯被韋斯咸嘅高耶迪喺四十九分鐘入波後,法卡奧浪費咗個單刀嘅扳平良機,表現令人失望;但佢初嚟埗到,家吓都未融入到球隊,加上佢個底都幾好,佢係主角嘅機會唔大。
路爾斯華倫西亞效力曼聯六年,應該識落一班齊齊去蒲嘅豬朋狗友,加埋佢都有前科,試過喺網上勾搭兩個女仔去偷食。不過,睇番數據,呢場波踢得最差嘅應該係左中場贊奴沙,嫌疑會大啲。呢位比利時新晉國腳今場成日交失波,傳球成功率低過六成,話唔定佢因為件事搞到集中唔到精神,所以成日傳失波。廿歲人就做曼聯球星,着埋傑斯留低件十一號波衫,年少氣盛嘅贊奴沙好可能係呢套曼聯四仔嘅主角。
睇到尾段,最可疑嘅人出現嘞,勞基梳爾十分鐘內拎兩張黃牌,被逐離場。喺廁所做埋呢啲瘋狂行為,仲被人偷拍埋,相信唔單止年少氣盛,仲要加多幾分衝動先做得出。再者,梳爾舊年試過用短訊去約一對姐妹花玩3P,似乎係個幾玩得又鹹濕嘅後生仔。
諗落個個都有可疑,如果我求大俠係曼聯領隊雲高爾,追查上嚟都幾頭痕,但好在雲帥仲有個好乖嘅契仔戴利白蘭特,可以等佢老人家放心。靠白蘭特喺補時嘅入波,曼聯先至可以追平1:1,搶番一分。雲高爾賽後都話滿意攞一分,仲讚自己下半場調入費蘭尼令到形勢好轉,但臨完場先唔見兩分嘅韋斯咸領隊艾拿迪斯就狂寸雲高爾,話曼聯係「長傳聯(Long-ball United)」,剩係識高Q大棍,呢吓寸得應。
識睇,一定係睇足英台【英波Live】:
http://soccer.appledaily.com
http://bit.ly/engballlive