要數馬場上嘅奇葩，我嘅心水必揀Grant利敬國，佢嘅停賽次數偏多，但成績好穩定，今季已取得31場頭馬，追平上季嘅數目。

馬季仲有成四個月，即幾乎肯定佢可以突破上季成績，創下個人最佳嘅馬季。

Grant今季運氣好旺，季初策「四季旺」攻下二級賽馬會短途錦標；而個多月前嘅谷草夜馬，楊明綸身體不適，未開賽就要退下火線。

「極爽」臨場換上Grant，結果一放到底大勝，佢做替工有意外收穫，反觀楊明綸已守齋三個幾月，真係一個天丶一個地。

Grant於2月16日贏出「平海掌星」，首度為蔡約翰建功，雖然蔡廐今季嘅表現稍為退步，但獲得呢個名牌大倉賞識，繼續提供支持，真係爽爆！

據知，倉主賽後對Grant嘅韁繩同留放工夫讚不絕口，讚佢可以令賽駒走得舒服，不慌不忙，容易掌握到節奏。

所以，今期（8日）於沙田馬場除安排佢續策「平海掌星」喺尾場三班1200米草地爭連捷之外，第六場四班1400米草地「美麗多多」亦交由佢主埋。

此駒上仗服役初出跑1200米配希威森，呢匹145倍巨冷喺直路上攞位非常論盡，直至最後百多米望空後如飛撲上，只輸三個馬位得第五。

「美麗多多」走光後，今場扳跑1400米，肯定唔會再係巨冷，換上練者新寵兒利敬國，排13檔估計會後上制勝。

俾蔡神仙大讚完後，即管睇吓Grant呢場處理外檔馬嘅功力會係點！

撰文：林湛穎

--------------
曾犯天條必入「黑名單」？華將洋將結局大不同！想知咩事要睇【馬上看經典】
-------------
馬匹賽績、騎練數據、名家貼士
【最強贏錢武器 盡在蘋果馬網】刨馬撳呢度
------------------
【武漢肺炎】專頁 全民自救 抗疫資訊盡在《蘋果》