【密密做】周子揚想儲老婆本 嘆受疫情影響靠食老本維持
結婚周子揚網台
周子揚離開大台後北上發展,最近因武漢肺炎疫情爆發,大陸的工作全面停頓。趁這段休假時間,他與不同藝人組成義工隊,到各區派口罩予有需要人士,又在家中寫歌、練歌,趁機增值自己。周子揚今日接受《蘋果》訪問時,透露工作大計,他表示已在香港開設網上電視台:「而家都冇人睇電視,反而大家鍾意開YouTube睇片,我哋想畀多啲選擇大家。咁啱朋友覺得可以投資就一齊做,自己就係股東之一,主要參與製作同幕前,想以香港為基地拍攝貼地啲嘅題材。而家已經運作緊,拍緊啲綜藝嘢、講吓鬼故,嚟緊仲計劃搵啲素人拍真人騷,我都好掛住講廣東話嘅日子,預計5月會正式公佈。」
周子揚坦言現時密密做,是為了儲老婆本。去年《蘋果》曾拍得他與長髮女子在中環拍拖,他表示兩人感情穩定,對於女友身份,周子揚說:「佢好低調,唔鍾意我講佢。(結婚)我哋有傾過,不過佢要好有規劃,唔可以草草了事,所以而家都係努力搵多啲錢先諗結婚,我知佢想要童話式婚禮。」他指女友經常香港大陸兩邊飛,現時因為疫症長期留港:「都可以趁呢段時間見多啲。」他表示因為疫情令工作叫停,坦言現時只是食老本:「真係好受影響,除咗拍嘢停晒,連啲金融地產生意,因為冇得見客都傾唔到。以前都冇諗過會咁,所以為咗第時生活好啲,婚姻嘅嘢更加要再準備得好啲。」
雖然在大陸的工作已暫停近半年,但他有份演出的佈地劇《我在北京等你》剛剛播映,周子揚說:「之前自己都係做啲正氣嘅角色,今次就做外國回流返嚟嘅擦鞋仔,好多國語同英文對白,真係好大挑戰。」他提到《我》是2018年拍攝,當時在北京淮南取景:「嗰次都算係我喺內地拍嘢咁耐最凍嘅一次,喺片場入面都係得零下幾度。」
-----------------------------
第三屆最港電影大獎
按此立即投票 -----------------------------
【武漢肺炎】專頁 全民自救 抗疫資訊盡在《蘋果》
周子揚在劇中要大罵內地女星李艾,笑言令片場很有火藥味。(受訪者提供)
周子揚與女友拍拖兩年,視對方為結婚對象。(資料圖片)