當世界各地嘅MP3市場，都差唔多俾iPod攻陷之際，有一個國家嘅MP3機市場，仍然可以憑自家生產嘅MP3機做主導，邊度？之唔係韓國囉！據韓國GFK市場研究公司公布，韓國今年上半年嘅MP3機市場佔有率，暫時以iriver的35%高據榜首，iPod只僅有1.8%！
iriver喺韓國MP3機市場成為熱賣榜首，當然唔係單靠「地頭心理」或者廣告宣傳咁簡單，佢哋最近有部U10喺日本推出，設計之特別，連日本人都話佢係「一番」大諗頭。

齋睇樣貌好似平平無奇！2.2"芒、26萬色，大不了咪話佢麻雀咁細（69×47×16mm/69.5g），可以播到MP3音樂之餘，又兼玩影片MPEG4！但大家留心睇，就會發現機身除咗一般開關按鍵之外，竟然不見了最常用嘅十字掣！因為U10使用了最新的D-Click系統，機身上、下、左、右都裝有感壓Sensor，只要向機身不同方向按下，就能做到4個不同方向的不同選擇，真係方便得嚟又有諗頭！
另外，跟機重有一個好別致嘅電腦接駁器，佢除咗可以經USB2.0接線上傳、下載檔案，同叉電外；全黑鏡面機身嘅U10，一放咗入去，就搖身一變成為一部「懷古電視」，iriver可能驚大家唔知佢玩嘢，跟機再整多個比U10還要大嘅紅外線遙控，勁鬼馬！暫時U10在日本只有512MB（24,980日圓/約港幣$1,776）及1GB（29,980日圓/約港幣$2,131）兩個型號，希望香港都快啲有行貨返啦！

記者：朱崇德