債務纏身仍大展拳腳
章小蕙靠個名上海開舖

蘋果日報 2002/03/26 00:00


欠債纍纍的章小蕙五月將於上海開新舖,今次她賣店舖名字和提供貨品,個人毋須投資現金,免卻投資上的風險,準備在內地大展拳腳。
章小蕙被裕泰興追債後,日前她又被大來信用証國際(香港)有限公司入稟追討逾十七萬卡數,但似乎未有影響她在內地大展拳腳的決心。昨日章小蕙在她位於中環的時裝店「Teresa」接受訪問時表示,五月她將在上海開新舖,不過今次她只需提供店舖名字及貨品,毋須投資任何金錢。

上海熟客投資
章小蕙說:「我聽日(指今日)會去上海睇舖,除咗恒隆廣場外,我重諗住喺新天地開第二間,我同上海拍檔巳經準備好,大概五月會開。其實今次嘅拍檔係我一個熟客,佢係上海人,我會將個舖頭名『Teresa』賣畀佢,我負責幫佢入貨、宣傳做埋形象。我有分佣,形式就好似麥當勞咁,另外,講明我每個月要返上海幾次睇吓間舖。」

哥哥中環剪髮
問章小蕙為何不投資?她說:「自己開舖好煩㗎,出入口稅我又唔識,咁嘅方式容易啲處理。其實內地重有好多地方都想同我合作,好似北京、成都同天津咁。我之前係諗過去台灣發展,但有朋友講話台灣政局唔穩定,經濟唔好,唔諗住。」
問章小蕙是次合作形式可獲利多少?她表示尚未計算,她說:「其實我冇錢喺手,因為我一收到錢,轉頭又要攞去買貨,下季嘅衫又要畀錢先。」
此外,張國榮(哥哥)昨日下午二時許,在男助手陪同下出現中環中建大廈,問他去哪裏,他說:「去KENQI剪頭髮。」
採訪:林妙萍
攝影:何國豪