黃曉明同Angelababy早前喺青島領結婚證，兩人並於十月喺上海設婚宴，領證後兩公婆各有各忙。曉明日前先同趙薇喺美國打手印，至於Baby亦喺北京出席活動，稍後更飛赴美國拍新戲《天煞─地球反擊戰2》。

不過，原來黃氏夫婦秘密返咗香港，《蘋果日報》記者獨家影到兩人，今晚現身中環置地廣場。

今晚七點半，本報記者獨家影到曉明同Baby甜蜜蹺手現身置地，記者上前恭喜兩人，佢哋就笑笑口揮揮手；問到係咪去探家人？佢哋就冇答。之後曉明同Baby坐車，其間曉明以普通話問助手有冇充電器；

上車後司機喺中環兜路，似乎想撇甩記者，但未能成功，座駕兜咗十五分鐘左右，去咗中環某幢大廈，有兩名保安人員護送佢哋上樓。

據悉曉明喺美國打完手印後，刻意留港兩天探望嬌妻，加上Baby嚟緊美國拍新戲，故特地來港同老婆見面，認真sweet。

到晚上九點四十五分，Baby與曉明離開該幢大廈，而林建岳都有現身。記者向黃生黃太講恭喜晒，問佢哋可否停低影相？不過兩公婆冇停低，表情有啲木口木面。問佢哋返嚟會否搵家人？兩人都冇反應，然後上車離開返回Baby位於貝沙灣寓所。