由韓國影帝宋康昊、劉海鎮及柳俊烈主演嘅韓片《逆權司機》將於本月21號喺香港上映，電影自上月2號喺韓國上映以來一直深受韓國歡迎，更突破1,200萬累計觀影人次，成為今年韓國首部電影破千萬人次。

由於電影是真人真事改編，當中係以1980年光州事件為主題，描寫當年軍政府以武力鎮壓光州學生及平民，造成傷亡。電影贏盡票房及口碑，就連現任總統文在寅都有捧場，並指當年民運嘅真相尚未被完全揭露，強調會重新徹查當年光州事件。

而國防部長宋永武今日表示將成立特別調查組，展開3個月調查，主要針對當年軍隊是否有出動配備MK-82炸彈嘅戰機候命支援鎮壓民運行動，同時調查當年軍人是否接受指令從直升機上開槍。

由於國立科學調查研究院早前證實，喺當年示威區附近發現逾150個彈孔，估計係從高處掃射而成。而今次調查將會查證是否屬實，同埋查看軍方保存嘅資料同埋機密檔案。