賓架C個千金舊年考會考，成績好好，有六A加上BBCC之類，成為尖子，適逢大學招收尖子入學，免讀中七，C千金自不然立即申請。今年舉行入學面試，C千金報咗中大港大，諗住父母都係中大畢業生，當然以中大首選，但現代年輕人性格好獨立，唔鍾意拉關係，以免俾同學取笑：你靠老竇啫。於是對父母講：「你哋唔可以同我打電話去中大港大，話畀人聽我報咗尖子！」賓架C自不然一口應承，結果呢，口試結果係中大唔收C千金，理由係佢冇一定決心以中大某科為第一志願。港大就收咗C千金噃，C千金對賓架C講：「中大唔收我，港大竟然收，你有冇識得人，打過電話㗎？如果打過，我唔入港大㗎！」

賓架C連忙解釋：「唓，中大人我識得唔少，但港大教授冇邊個認得，如果我要打電話，都打咗畀中大先啦！」C千金諗吓，有道理噃，屋企同中大關係咁好，都唔收我，港大讀得過啫，於是欣然入學。
賓架C嘅經驗，絕非單一事件。記得賓架L位公子喺倫敦留學歸來，加入某大銀行，事先唔肯同賓架L講，更警告老竇：「如果你同我老闆提起我係你個仔，我會立即辭職！」賓架L只得笑笑，同個仔嘅老闆打高爾夫球都唔敢講起個仔就係你夥計，有志氣嘅年輕人，就是如此，聽日再講古仔。