【新增影片】
世界級頂尖跳水運動員呢個禮拜會齊集波斯尼亞，出席懸崖跳水系列賽第5站賽事。波斯尼亞站係全年六站比賽嘅尾二一站，煞科嘅一站就會喺智利舉行。

講番今屆賽事，男子組現時頭五位選手只係相差70分，邊個贏冠軍仲係未知數，英國嘅艾德列治暫時以480分排榜首，領先同樣嚟自英國嘅亨特20分。墨西哥嘅柏尼迪斯以450分排第三，至於一pair美國代表高度尼同埋鍾斯就以410分並排第4位。

女子組嘅形勢就明朗啲，美國嘅艾芬娜領先緊墨西哥嘅占文尼斯170分，贏冠軍嘅機會比較樂觀。值得一提嘅係，呢場懸崖跳水嘅比賽地點係一條有427年歷史嘅橋進行，雖然之前曾經俾戰火摧毀，但係之後重建，仲喺2004年重新開放到依家；一年之後更加畀聯合國教科文組織列為世界遺產。有興趣睇咁刺激跳水比賽嘅粉絲，可以喺香港時間聽晚（9月16日）8點半上網（www.redbullcliffdiving.com）睇直播㗎！