當年今日
關於我們

化身佛地魔
賴夫費恩斯追殺哈仔

蘋果日報 2004/08/06 00:00


瘋魔全球嘅童話故事系列《哈利波特》第四集電影《火盃的考驗》,啱啱喺英國開拍。喺今集裏面,主角哈利波特嘅殺父仇人佛地魔終於現身,好多人都關注會由邊個扮演呢個大奸角,結果電影公司前日正式宣布英國男星賴夫費恩斯(RalphFiennes)係最佳人選。

麥高維治落選
喺《哈利波特》嘅故事入面,佛地魔係個無惡不作嘅魔頭,好多法力高強嘅巫師,甚至連佢個名都唔夠膽提,哈仔嘅父母亦都係俾佢殺死,而哈仔額頭上嘅閃電疤痕亦都係佛地魔嘅傑作。之前荷李活曾經傳出過老牌男星尊麥高維治(JohnMalkovich)會演佛地魔,不過幾經挑選,電影公司終於揀咗曾經兩度提名奧斯卡,又喺《舒特拉的名單》及《沉默的赤龍》做過奸角嘅賴夫費恩斯做大魔頭。
名單公布之後,唔少fans喺網上留言話今次選角好啱,不過有人就彈賴夫一啲都唔似佛地魔,完全係角色錯配喎。而喺呢套片中飾演哈仔亞裔女友張秋嘅人,將會落喺香港移民後裔KatieLeung身上。今次哈仔新片《火盃的考驗》將會由曾經執導《四個婚禮一個葬禮》嘅英國導演米克紐維爾(MikeNewell)執導,暫定喺下年十一月上映。