由韓國男星姜河那、朴敘俊主演嘅新片《青年警察》，上月9號喺韓國公映，目前已累積逾500萬入場人次，成績不俗，而電影亦於噚日喺香港上映，日前姜河那及導演金周煥襲港為電影宣傳，並抽空接受本報訪問。

對於新片突破500萬入場人次，姜河那都表示好多謝觀眾嘅支持，導演就指有咁好成績，所以幸福到瞓唔着。被問到有冇欣賞嘅香港導演時，導演金周煥坦言：「最鍾意《無間道》嘅劉偉強導演及《桃姐》嘅許鞍華導演。」對於點解會揀姜河那、朴敘俊演出新片？導演反而謙虛地表示係姜河那、朴敘俊兩人選擇咗佢，並表示《青年警察》嘅賣點在於兩位年輕嘅演員，相當盞鬼。及後佢又大讚兩人演技好：「以河那為例，佢完美理解角色，所以拍攝時嘅動作、表情都做到足。」

於片中飾演學警嘅姜河那，表示自己叔叔正係警察，覺得警察好有型，不過就指警察並唔係自己兒時嘅夢想，並坦言如果現實生活好似電影咁，亦會選擇去救受害女子。被問到電影中嘅動作場面，姜河那表示：「當然都係親身上陣，而且為咗拍攝時唔會受傷，所以事前同敘俊哥練習咗好多次，亦多次請教武術指導。」導演亦大讚兩人身手好好，對兩人嘅動作場面好滿意。片中除咗有動作場面，亦有唔少奔跑嘅場面，姜河那坦言拍攝奔跑場面時都好辛苦：「因為天氣太凍，所以拍攝時更加辛苦，最辛苦係一開始要追車一幕。」

拍攝時有冇趣事發生？姜河那反而嚴肅地指：「拍動作場面時冇乜趣事發生，因為都係好危險嘅情節，反而大家都集中拍攝，只希望唔好受傷，不過敘俊哥就曾經撞到耳仔。」導演續指：「比起趣事有一幕都好難忘，就係河那跑樓梯一幕，原來佢拍攝時整傷咗手指，但冇即時叫停，當佢從遠處滴住血跑返嚟我哋先知佢受咗傷，仲要按咗30分鐘先止到血。」認真驚嚇，導演更幽默稱姜河那係「韓國成龍(Korean Jackie Chan)」，令姜河那立即耍手擰頭否認。

被問到點評價着上制服嘅自己，姜河那笑言制服好合身，所以都覺得自己型仔咗，不過姜河那對於自己嘅身材就唔係好滿意：「冇刻意操肌，因為自己本來唔係身形好嘅類型，但都有為電影管理身形。」咁最滿意自己身體邊個部位？姜河那笑言係腳趾，在場記者一臉不信地問導演嘅睇法時，導演就搞鬼話「屁股最好睇」，場面爆笑。由於電影有唔少搞笑嘅情節，拍攝時有冇經常NG？姜河那直言：「我同敘俊哥都好容易笑，但為咗唔NG我哋都要努力忍笑。」不過導演就踢爆兩人搞到攝影師笑到手都震晒，就算忍笑都係要NG拍過。

對於現實性格與片中角色性格嘅差別，姜河那指：「姜熙烈係一個好理性、事事講求邏輯性嘅人，但現實中嘅我比較感性。」被問到今次同朴敘俊合作嘅感受，姜河那表示兩人好夾，相處得好舒服，又指最欣賞對方自信心好強嘅一面：「與敘俊哥合作前只覺得佢係一個好靚仔、好高嘅演員，認識佢之後發現佢係一個好親切嘅哥哥。」提到片中即興加咗一啲粗口嘅對白，一向乖仔形象嘅姜河那亦自爆私下自己都會講粗口，認真誠實。

姜河那將於下月11號入伍，闊別螢幕兩年，姜河那表示好期待入伍，而入伍前就要忙住為新片宣傳。現年27歲嘅姜河那算係早入伍嘅韓國男星，點解想咁早入伍？姜河那表示：「其實一直都好想早啲入伍，同時覺得依家係一個好好嘅時機，所以就咁早入伍。」及後導演就大讚姜河那係模範青年：「河那一直都Keep住做自己認為啱嘅事，而佢認為身為韓國嘅男人就一定要去當兵，所以選擇早早自行入伍。」提到退伍嘅計劃，姜河那指想去西藏旅行。