挾倉市進入第二周，最殘的航運及內房股氣勢迫人，資源股亦陸續開車。後市點睇？魏力非正式民意調查顯示，後市睇法相當分歧：淡友說，成交唔配合，完全係彈散格局！好友說，目前係反彈第一波，先挾淡倉，之後再掃二三線股，今個月有運行！魏力認為，目前人心仍虛怯，買貨博反彈相對安全，到成交轉旺，就是出貨之時。
順勢而行，跟紅頂白，今日就介紹航運股海豐國際（1308）。以目前全球經濟形勢而言，海豐係最穩陣的航運股。何出此言？皆因公司主打中國及日本航線，佔去年總收入83%，韓國佔5%，其他地區僅佔12%，意味歐債危機對其影響甚低。
當然，中國經濟增長放緩，「保八」有難度，日本經濟亦未見起色，不過，溫總一鎚定音，今年重點係「保增長」，而非「遏通脹」，刺激經濟措施排隊出台，而振興內需更是重中之重，對海豐此類主攻內陸運輸的企業最為受惠。
海豐首季賺1324.3萬美元，按年雖跌46%，但與其他同業勁蝕相比已好得多。以全年盈利倒退三成計，目前PE亦不過9倍。大摩報告亦料海豐首季盈利已見底，目標2.86元，水位57%。戰友上車，短線不妨先睇2.05元。

魏力
http://www.facebook.com/2012jason