出爐視帝王浩信今日喺中環出席植物蛋發佈會，即場示範煮植物蛋，期間佢自爆今次活動冇加價，事後佢指呢個活動係之前接落，問佢係咪會加價？王浩信話：「公司處理，最緊要係客戶覺得合理。」佢透露現時有食素嘅習慣：「盡量全素，太太（陳自瑤）都慢慢轉緊，因為佢都相信佛教嘅教育，所以佢都支持。」會唔會煮蛋畀太太食？王浩信表示會跟全家人分享。

對於噚晚王浩信媽咪帶咗囡囡到現場支持，太太則獨留家中，佢解釋：「太太嚟會搶fo（焦點），我想小愛喺低調環境，睇到爸爸嘅努力，最後係有奬呢一課，囡囡同媽咪嚟，我唔想有人影相，大家都認唔到，成功咗，冇人影到，係最後我講大家先知。」心中有數知自己攞硬？王浩信即刻話：「唔係，如果有奬的話，我希望囡囡上呢一課啫，係監製教我，畀囡囡知道努力係有回報同滿足感。」點樣o氹番太太？佢表示：「佢喺電視機旁邊支持我，佢都好開心，佢都好欣慰，因為佢知道呢個係我多年嘅夢想，呢個願望最後成真，佢都戥我開心，今朝開早，未有時間慶祝，不過噚晚返到去，同太太傾咗幾句就瞓。」有冇攬下錫下？佢冧笑咁話：「呢啲一定有，但唔講咁多屋企嘢，唔好將屋企嘢講晒出嚟，嚟緊多啲時間慶祝再同大家分享。」點樣奬勵自己？佢話：「健康最重要，因為我成日都覺得唔夠瞓，體能差咗，有好體能先可以接受以後大挑戰。」

提到佢噚晚講到C君知佢捱窮渡日，王浩信指當時係做歌手嘅時候，佢話：「我哋打完籃球就去食芝士麵，有次我發現自己身上冇錢，㩒錢又㩒唔到，班兄弟話幫我畀，我就發咗小脾氣，覺得自己好渣，我話唔使，呢段日子都有1、2年，不過我好多謝我家人，唔使我拎錢返去俾父母。」0依家買得起間芝士麵舖未？佢笑住話：「未得！」

講到汪明荃噚晚獲頒「50周年光輝獎」時，佢講到希望無綫嘅「山頭文化少啲啲」，現場好多藝員聽到O晒嘴，王浩信話：「我唔係好理解咩叫山頭文化，（高層鬥爭！）我反而著重演員嘅配套同支持，收入同休息時間係絕對影響我哋，我希望公司多啲關注。」

精選娛聞，喺晒《娛果》
http://fb.com/appledailyent